「地價貴 股價平」- 陸羽仁

已有520人閱讀2011-05-14 15:49標籤:陸羽仁

大宗商品價格第二輪「閃跌」,拖累全球股市。內地上證綜指挫1.4%,恒指亦收低218點至23074點,唯一叫做好少少的是大市成交縮減至只有672億元,沽壓未係好大。

收市後中央公佈再調升銀行存款準備金率0.5個百分點,下周一生效,大型銀行存款準備金率升到21%,即銀行每收100元存款,要保留20元作存款準備金。

加準備金加到麻木

中環茶友話,內地通脹高企,阿爺基本上係連續不斷出招,每月加一次存款準備金,每兩月加一次息,四月加完息,應該六月會再加息。呢次加存款準備金係市場預期內,都可以話加到麻木,問題是存款準備金加到咁高,對控制銀根作用會相當大,銀行體系會非常缺錢,企業借錢會好難,細發展商真係要借高利貸先要有得周轉。

佢話加完存款準備金,短期少一個不明朗因素,但阿爺好似想出招打壓樓價,可能要等埋呢招數出籠,才望到個短期政策底,叫做呢個月的招數出完,再打壓都等下月。




住大市的另一因素是美元第二波反彈,大宗商品價格跌勢未止。原油價價上日暴挫5.5%至每桶99美元樓下,昨日再跌至96美元水平。黃金白銀價格繼續插,金價跌至每盎司1489美元;銀價跌得仲甘,上日跌完7.7%,昨日再挫近6%至33.8美元水平,唔夠24小時跌超過一成二。

地產股距高價好遠

政府推出三幅地皮拍賣,發展商競投異常激烈,最靚港島的司徒拔道前嶺南書院地皮由新地(016)投得,呎價24,829元,為市場預期上限,以咁高價投得,新地都要賣到40000元一呎才有肉食。另外九龍塘又一村海棠路地皮由中國海外(688)獨資投得,呎價15,742元,亦屬市場預期的上限水平,亦是九龍區第三高呎價紀錄。中國海外董事總經理游偉光表示,將建10間別墅,呎價料逾2.6萬元咁話。

不過最誇張的是元朗牛潭尾路旁近碧豪苑地皮,競爭激烈,由長實(0001)以高底價124.4%的6.62億元投得,樓面呎價6,548元,要賣到10000元一呎才有肉食。

中環茶友話,近日資產市場有兩個怪現象,一個就係股市跌,但係新股繼續上市,有仲谷到火紅火綠,好似隻米蘭站咁,又話超購百倍計,另一個就係樓價貴,但地產股就平,好多坐擁靚地的龍頭地產股,都仲同高位差一大截,同樓價屢創新高根本脫晒節。

今次賣地,元朗地都投到6000幾元一呎,顯示發展商相當睇好,二手業主睇到呢地價,亦唔會急於賣樓。不過樓價、地價創晒新高,但發展商的股價就有排未到新高,以新地計,昨收120.5元,距離08年頭高位175元,仲有漫漫長路,到底係股價平,定係樓價貴?咁鍾意買樓的人,點解又唔去買新地?
 

Bookmark and Share

剛表態過的朋友

    評論


    發表評論